బర్మాలో సందడి చేసిన రామ్ చరణ్

తండ్రి రాజకీయాల్లో బిజీగా ఉండడంతో ఆయన తరఫున రామ్ చరణ్ పెద్దరికాన్ని తీసుకుని పలు ఫంక్షన్లకు హాజరవుతున్నాడు. పైగా, షూటింగులు కూడా ఇంకా ఏమీ స్టార్ట్ కాకపోవడంతో ఈ ఖాళీ సమయాన్నిలా వినియోగించుకుంటున్నాడు. మొన్నామధ్య ముంబైలో జరిగిన ఆమిర్ ఖాన్ మేనల్లుడు ఇర్ఫాన్ పెళ్లి రిసెప్షన్ కి అటెండ్ అయిన చరణ్, తాజాగా మయాన్మార్ (బర్మా) వెళ్లాడు. బ్రిటిష్ వాళ్ల పాలనలో మన తెలుగు వాళ్లు ఎంతో మంది పనుల కోసం అప్పటి బర్మాలోని రంగూన్ వెళ్లి, అక్కడే స్థిరపడిపోయారు. వాళ్లంతా యాంగాన్ నగరంలో 'బర్మా తెలుగు అసోసియేషన్' గా ఓ సంఘం కూడా పెట్టుకున్నారు. ఆ సంస్థ శత వార్షికోత్సవాలు ఇప్పుడు జరుగుతున్నాయి. వీటికి చీఫ్ గెస్ట్ గా చరణ్ హాజరయ్యాడు.
        అభిమాన హీరో తమ కళ్ళ ముందు ప్రత్యక్షమవడంతో వాళ్లంతా కేరింతలు కొడుతూ రిసీవ్ చేసుకున్నారు. "బర్మాలో నాలుగు లక్షల మంది తెలుగు వాళ్లు వున్నారంటే నమ్మలేకపోతున్నాను. వారు నాపై చూపించిన ప్రేమపూర్వక ఆదరణకి ముగ్దుడినయ్యాను. ఆ అందమైన ప్రదేశం, రుచికరమైన వాళ్ల వంటలు నన్నెంతో ఆకట్టుకున్నాయి" అంటున్నాడు చరణ్. ఈ మాటలు విన్న అల్లు శిరీష్ "నాలుగు లక్షల మందా? అంటే, ముంబై, పూనే, అహ్మదాబాద్ లలో వున్న తెలుగు వాళ్ల కంటే ఎక్కువన్న మాట. అయితే, మన నెక్స్ట్ మార్కెట్ బర్మానే!" అంటూ వ్యాపార దృష్టితో కామెంట్ చేసాడు.

నేటి సినిమా వార్తలు... టూకీగా!

ఈ రోజు (ఫిబ్రవరి 11 ) 'గగనం', 'వస్తాడు నా రాజు' సినిమాలు రిలీజ్ అవుతున్నాయి.
*      వెంకటేష్, త్రివిక్రమ్ శ్రీనివాస్ కాంబినేషన్ లో రూపొందే తాజా చిత్రం షూటింగ్ మార్చి 15 న ప్రారంభమవుతుంది.
*      ఈ నెల 25 న రిలీజ్ అవ్వాల్సిన 'యమ కంత్రీ' సినిమా వాయిదా పడింది. మార్చి 4 న రిలీజ్ చేస్తారట.
*      అల్లరి నరేష్ హీరోగా నటించిన 'అహ నా పెళ్ళంట' సినిమాని ఇటీవల మరణించిన దర్శకుడు ఈవీవీ సత్యనారాయణకు అంకితం చేస్తున్నారు.
*      రఫీ హీరో, దర్శకుడుగా రూపొందే తెలంగాణా ఉద్యమ చిత్రం 'ఇంకెన్నాళ్ళు' పాటల రికార్డింగ్ జరుగుతోంది.
*      'తెలంగాణా జిందాబాద్' పేరుతో మరో ఉద్యమ చిత్రాన్ని ఎం.యస్. గుప్తా నిర్మిస్తున్నారు.
*      ఎల్.బీ.శ్రీరాం, అలీ తాతామనవళ్ళుగా నటించిన 'తిమ్మరాజు' సినిమా ఫిబ్రవరి నెలాఖరున రిలీజ్ అవుతోంది. 
*      రాంగోపాల్ వర్మ తీస్తున్న ఐదు రోజుల సినిమా 'దొంగల ముఠా' మూడో రోజు షూటింగ్ లో వుంది.
*      శ్రీహరి హీరోగా డ్యాన్స్ మాస్టర్ అమ్మ రాజశేకర్ దర్శకత్వంలో 'ముద్ర' పేరుతో ఓ సినిమా తయారవుతోంది.

కాజల్ ఇక బాలీవుడ్ చెక్కేస్తుందా?

పైకి ఎన్ని కబుర్లు చెప్పినా కథానాయికలందరికీ వాళ్ల అంతిమ లక్ష్యం బాలీవుడ్డే అన్న సంగతి మనకు తెలుసు. ఎందుకంటే, హిందీ సినిమాల్లో క్లిక్ అయితే ఇక వాళ్ల పంట పండినట్టే. రీజనల్ లాంగ్వేజెస్ లో ఎన్ని సినిమాలు చేసినా రాని పేరు ఒకటి, రెండు హిందీ సినిమాలు చేస్తే చాలు, వచ్చేస్తుంది. అందుకే, సౌత్ సినిమాలలో చేస్తున్నప్పటికీ హీరోయిన్లంతా బాలీవుడ్ మీద ఓ లుక్కేస్తూనే వుంటారు. ఇప్పుడీ లిస్టులో కాజల్ కూడా చేరింది. తాజాగా ఓ హిందీ చిత్రాన్ని యాక్స్పాట్ చేసింది. తమిళంలో సూపర్ హిట్ అయిన 'సింగం' సినిమాని అజయ్ దేవగణ్ హీరోగా హిందీలో ఇప్పుడు రిమేక్ చేస్తున్నారు. ఇందులో మొదట అనుష్కని తీసుకోవాలనుకున్నారు. అయితే, ఆమె బాలీవుడ్ కి వెళ్లడానికి ఇంటరెస్ట్ చూపించక పోవడంతో, ఇప్పుడా అవకాశం కాజల్ కి దక్కింది. సో... తనక్కడ కూడా సక్సెస్ అవుతుందేమో చూద్దాం!

రేపే నాగార్జున 'ఢమరుకం' ప్రారంభం

నాగార్జున హీరోగా నటించే సోషియో ఫ్యాంటసీ చిత్రం 'ఢమరుకం' షూటింగ్ రేపే (ఫిబ్రవరి 12) ప్రారంభమవుతోంది. మినిమం గ్యారంటీ దర్శకుడిగా కామెడీ చిత్రాలు రూపొందించే శ్రీనివాస రెడ్డి దర్శకత్వంలో దీనిని ఆర్.ఆర్.మూవీ మేకర్స్ అధినేత వెంకట్ నిర్మిస్తున్నాడు.  భారీ బడ్జెట్ తో నిర్మిస్తున్న ఈ సినిమా కోసం భారీ సెట్స్ కూడా వేస్తున్నారు. అలాగే ఈ సబ్జక్ట్ కి కాస్ట్యూమ్స్ పరంగా కూడా  రిచ్ నెస్ అవసరమట. ఆ విషయంలో కూడా స్పెషల్ కేర్ తీసుకుంటున్నారు. ఫ్యాంటసీ కథాంశం మిళితమైనందువల్ల గ్రాఫిక్స్ కి కూడా ఎంతో ప్రాధాన్యత ఉందనీ, సుమారు 50 నిమిషాల పాటు స్క్రీన్ మీద ఈ గ్రాఫిక్స్ మాయాజాలం ప్రేక్షకులను మరో లోకంలో విహరింపజేస్తుందట. ఇందులో నటించే హీరోయిన్ గా ఇప్పటికే అనుష్కను ఎంపిక చేసారు.   

జెనీలియా పెళ్లికూతురు కానుందా?

చిలిపి కళ్ల సుందరాంగి జెనీలియా త్వరలో ఇక సినిమాలకి గుడ్ బై చెప్పనుందా? ఇక రియల్ లైఫ్ లో సెటిల్ కానుందా? ఇప్పుడు బాలీవుడ్ లో ఈ వార్తలే చక్కర్లు కొడుతున్నాయి. తన చిరకాల మిత్రుడు, సహ నటుడు రితేష్ దేశ్ ముఖ్ ను త్వరలో జెన్నీ పెళ్లి చేసుకోనుందని వార్తలు గుప్పుమంటున్నాయి. మహారాష్ట్ర మాజీ ముఖ్య మంత్రి, ప్రస్తుత కేంద్ర మంత్రి విలాస్ రావ్ దేశ్ ముఖ్ తనయుడైన రితేష్ తో జెనీలియా ప్రేమాయణం గురించి అందరికీ తెలిసిందే. ఇన్నాళ్లూ తమ సాన్నిహిత్యాన్ని గుంభనంగా ఉంచిన ఈ జంట, ఈ మధ్య తమ బంధాన్ని మెల్లిగా బయటపెడుతోంది.
          ఇటీవల బాలీవుడ్ హీరో అక్షయ్ కుమార్, ట్వింకిల్ ఖన్నాల వెడ్డింగ్ ఎనివేర్సరీలో ఈ జంట అందరి ముందూ కలసి మెలసి తిరిగారు. ఇది చూసిన బాలీవుడ్ జనం 'ఇక త్వరలో వీళ్లిద్దరూ మేరేజ్ చేసుకోవచ్చు. అందుకే తమ బంధాన్ని నలుగురి ముందూ ప్రదర్శిస్తున్నారు' అంటున్నారు. ఇందులో నిజమెంతుందో తెలియాలంటే కొన్నాళ్ళాగాల్సిందే! 

శాటిలైట్ రైట్స్ లో 'దూకుడు'

ఒకప్పుడు తెలుగు సినిమాలకు శాటిలైట్ రైట్స్ రూపంలో మంచి డబ్బులు వచ్చేవి. చిన్నా చితకా సినిమాలకి కూడా లక్షల్లో వచ్చేవి. జీటీవీ తమ తెలుగు చానెల్ స్టార్ట్ చేసాక ఇది మరీ ఎక్కువైపోయింది. ఫ్లాప్ సినిమాలకు కూడా కోట్లు ఆఫర్ చేయడం జరిగింది. దాంతో ఆ పోటీని తట్టుకోలేక, ఈటీవీ, మాటీవీ, జెమినీ కొన్నాళ్ల క్రితం తమకు తాముగా ఈ పోటీ నుంచి తప్పుకోవడంతో ఒక్క జీటీవీ మాత్రమే వీటిని ఎక్కువగా కొంటోంది. జెమినీ కూడా అప్పుడప్పుడు కొంటోంది కానీ, పోటీకి వెళ్లి కొనడం లేదు. దాంతో పెద్ద హీరోల సినిమాలకే మంచి రేటు వస్తోంది.
       ఈ నేపధ్యంలో మాటీవీ కొత్తగా 'మా మూవీస్' పేరుతో మరో కొత్త చానెల్ ని ప్రారంభించడంతో శాటిలైట్ రైట్స్ మళ్లీ ఊపందుకుంటున్నాయని  టాలీవుడ్ వర్గాలు భావిస్తున్నాయి. దానికి ఊతమిస్తున్నట్టుగా ఇటీవల మాటీవీ 'దూకుడు' సినిమా శాటిలైట్ రైట్స్ ని పెద్ద మొత్తం వెచ్చించి, చేజిక్కించుకున్నట్టు చెబుతున్నారు. సుమారు 5 .75 కోట్లకు ఈ సినిమా హక్కుల్ని మాటీవీ పొందినట్టు తెలుస్తోంది. దీంతో మాటీవీ ఇక శాటిలైట్ రైట్స్ విషయంలో 'దూకుడు'గా వెళ్లడం ఖాయమని అంటున్నారు. 

డ్రగ్స్ తో పట్టుబడ్డ జీవిత సోదరుడు మురళి

టాలీవుడ్ డ్రగ్స్ కేస్ లో తాజాగా ఈ రోజు మరో పెద్ద చేప దొరికిపోయింది. నిర్మాత, ప్రముఖ నటి జీవిత సోదరుడు అయిన మురళి 200 గ్రాముల కొకైన్ తో రెడ్ హేన్ డేడ్ గా పోలీసులకు పట్టుబడ్డాడు. గతంలో 'మగాడు', 'శేషు' వంటి చిత్రాలను నిర్మించిన మురళి గత కొంతకాలంగా డ్రగ్స్ కి అలవాటు పడ్డాడని అంటున్నారు. ఆ క్రమంలో కొకైన్ తీసుకుని వెళుతుండగా హైదరాబాదు, జూబిలీ హిల్స్ ప్రాంతంలో మాటువేసిన వెస్ట్ జోన్ డీసీపీ బృందం మురళీని అరెస్ట్ చేసింది. ఆ సమయంలో అతనితో బాటు వున్న మరో ఇద్దరు వ్యక్తుల్ని కూడా పోలీసులు అదుపులోకి తీసుకున్నారు. ఈ సంఘటనతో టాలీవుడ్ మరోసారి ఉలిక్కిపడింది. మొన్నామధ్య టాలీవుడ్ ని డ్రగ్స్ ఉదంతం కుదిపేసిన సంగతి తెలిసిందే. బడా తారలు కూడా ఈ డ్రగ్స్ వలయంలో ఉన్నారంటూ వార్తలొచ్చాయి.