నాగార్జునకి బ్రహ్మానందం వడ్డన

	హాస్యనటుడు బ్రహ్మానందంకి  సినిమా ఇండస్ట్రీ ఆఖరికి 'అన్నదాత' బిరుదుని ఇచ్చేస్తుందేమో! ఎందుకంటే, ఇంట్లో భార్య చేత రకరకాల వంటకాలు వండించి  తీసుకెళ్లి తన సహచర నటీనటులకి కొసరి కొసరి వడ్డిస్తున్నాడట. మొన్నా మధ్య రామ్ చరణ్ తేజ కూడా 'బ్రహ్మానందం అంకుల్ తెచ్చిన లంచ్ సూపర్ గా ఉంద'న్నాడు. ఇప్పుడు నాగార్జున కూడా అదే అంటున్నాడు. "షూటింగ్ టైం లో బ్రహ్మానందం పొద్దున్నే ఫోన్ చేస్తాడు, ఈరోజు మీకు కెరియర్ తెస్తానంటూ. ఇక తెచ్చాక లంచ్ టైం లో వడ్డించడం మొదలెడతాడు. అన్నం, కూరలు వద్దంటున్నా కూడా ఎక్కువగా పెట్టేస్తాడు. ఇక నెయ్యి కూడా పోస్తూనే ఉంటాడు. 'వద్దు బాబూ' అన్నా ఊరుకోడు. రోజూ డైటింగ్ చేసే నేను అలా ఒక్కోసారి బాగా లాగించేస్తుంటాను" అంటూ తాజాగా ఓ టీవీ ఇంటర్వ్యులో చెప్పుకొచ్చాడు. ఇలా బ్రహ్మానందం తన రుచికరమైన వంటకాలతో అందర్నీ బుట్టలో వేసేసుకుంటున్నాడన్న మాట.