టాలీవుడ్ ని ఈమధ్య కాలంలో మాఫియా, ఫ్యాక్షన్ సంబంధాలు పట్టిపీడిస్తున్నాయి. ఫైనాన్స్ కోసం కొంతమంది నిర్మాతలు ఇటువంటి వర్గాలతో చెట్టాపట్టాలేసుకుని తిరగడం వల్ల ఆ సంబంధాలు బలపడుతున్నాయి. పైగా, ఇటువంటి వాళ్లు తమకు అండగా వున్నారని చెప్పుకోవడాన్ని ఈవేళ చాలా మంది గర్వంగా ఫీలవడం టాలీవుడ్ చేసుకున్న దౌర్భాగ్యం. సినిమా వాళ్లు అందించే 'సౌఖ్యాల'కు అలవాటు పడ్డ ఆ నేరమయ వర్గాలు టాలీవుడ్ ని కమాండ్ చేసే స్థితికి ఎదిగిపోయాయి. ఇప్పుడు మద్దెలచెరువు సూరి హత్యోదంతం ఈ లింకులను మరోసారి బహిర్గతం చేస్తోంది. సూరి హత్యలో కీలక పాత్రధారిగా భావిస్తున్న భాను కిరణ్ గత కొంత కాలంగా సినిమా వాళ్లతో నెరపుతున్న 'బంధుత్వాలను' చూసి అందరూ ఆశ్చర్యపోతున్నారు. సి.కల్యాణ్, శింగనమల రమేష్ వంటి ప్రముఖ నిర్మాతలు భానుతో కొనసాగిస్తున్న సంబంధాలు ఒక్కొక్కటీ వెలుగులోకి వస్తున్నాయిప్పుడు. సూరి పేరు చెప్పి భాను సినిమా పంచాయతీలు కూడా నిర్వహించాడంటే ఈ నేరమయ వ్యవస్థ టాలీవుడ్ లోకి ఎంతెలా చొచ్చుకుపోయిందో మనం ఊహించచ్చు.
భాను కొంతమంది హీరోయిన్లతో 'సంబంధాలు' కూడా పెట్టుకుని, ఆయా హీరోయిన్లను కొన్ని సినిమాలకు రికమండ్ చేసేవాడంటే టాలీవుడ్ లో అతనెంతెలా ఎదిగిపోయాడో అర్ధం చేసుకోవచ్చు. ఇప్పుడు నిర్మాత కల్యాణ్ పేరు బయటకు రావడంతో అతను అండర్ గ్రౌండ్ లోకి వెళ్లిపోయాడని తెలుస్తోంది. ఈ వర్గాలతో లింకులు వున్న వాళ్లు ఇంకెంత మంది బయటకు వస్తారో త్వరలోనే తెలుస్తుంది. ఒకప్పుడు తెలుగు చిత్ర సీమకు ఎంతో పేరుండేది. ఇప్పుడా పేరు ఇటువంటి వాళ్లతో కలుషితమైపోతోంది. బాలీవుడ్ లాగే టాలీవుడ్ కూడా నేరగాళ్లకు నిలయంగా మారిపోతోంది. దీనికి ఇప్పటికైనా అడ్డుకట్ట వేసుకోకపోతే, టాలీవుడ్ కి ఉన్న పేరు కాస్తా ఎగిరిపోతుంది!
No comments:
Post a Comment