'క్రికెట్ గర్ల్స్ & బీర్' పాటలు

తెలుగులో ఇప్పుడు రకరకాల టైటిల్స్ తో సినిమాలు వచ్చేస్తున్నాయి. అటువంటి సినిమాల్లో ఒకటి 'క్రికెట్ గర్ల్స్ & బీర్'. టైటిల్ చూస్తే ఇదేదో కాస్త మోతాదు ఎక్కువే అన్నట్టుగా వుంది కదూ! ఈ సినిమా ఆడియో వేడుక సోమవారం రాత్రి హైదరాబాదులోని ఫిలిం నగర్ కల్చరల్ క్లబ్ లో జరిగింది. ముఖ్య అతిథిగా విచ్చేసిన రాష్ట్ర మంత్రి రఘువీరారెడ్డి పాటల సీడీని విడుదల చేయగా, తొలి సీడీని నిర్మాత సి.కల్యాణ్ అందుకున్నారు. ఈ సందర్భంగా మంత్రి మాట్లాడుతూ, "ఇందులో హీరోగా నటించిన ఆదర్శ్ మా అన్న కొడుకు. ఇన్నాళ్లూ వాడు అన్నీ విలన్ పాత్రలే చేసాడు. అందుకే వాడిని 'విలన్' అంటూ సరదాగా పిలుస్తాను. ఈ సినిమా ద్వారా హీరో అనిపించుకున్నాడు. ఇది మంచి విజయం సాధించాలని కోరుకుంటున్నాను" అన్నారు. ఈ కార్యక్రమంలో ఇంకా వరుణ్ సందేశ్, ఆదర్శ్, సూర్యతేజ్, నాగశౌర్య, సారిక, దైవజ్నశర్మ, దర్శకుడు ఉమేష్ కుమార్, నిర్మాత సతీష్ బాబు తదితరులు పాల్గొన్నారు.