"అవన్నీ డాడీ దగ్గర నేర్చుకున్నాను" -శృతి హాసన్

	కమల హాసన్ తనయ శృతి హాసన్ ఇప్పుడు రోజులు లెక్కపెడుతూ కూర్చుంది. జనవరి 14 ఎప్పుడొస్తుందా? అని ఎదురు చూస్తోంది. ఎందుకంటే, ఆమె కధానాయికగా నటించిన 'అనగనగా ఓ ధీరుడు' సినిమా ఆరోజు విడుదలవుతోంది. టాలీవుడ్ లో తన కెరీర్ ను అటో ఇటో తేల్చేది ఆ సినిమానే! తన తల్లిదండ్రుల నుంచి అందం... అభినయం వారసత్వంగా పొందిన శృతి మంచి గాయని కూడా. ఈ చిత్రం విడుదలవుతున్న నేపధ్యంలో ఆమెతో జరిపిన ఇంటర్వ్యు విశేషాలు.... "మీ డాడీ బ్రాండ్ మీకెంతవరకు ఉపయోగ పడుతుందనుకుంటున్నారు ?" "కమల్ డాటర్ గా నన్ను అందరూ గౌరవిస్తారు. అది అంత వరకే! ఎందుకంటే, డాడీతో ఎవరినీ కంపేర్ చేయలేం. అలాగే డాడీని ఎవరితోనూ కంపేర్ చేయలేం. ఆయన ప్రత్యేకత అది. అటువంటప్పుడు నాకు కూడా ఇది వర్తిస్తుంది. అయినా నాకూ అది ఇష్టం లేదు. స్వయం ప్రకాశం కావాలన్నది నా కోరిక" "సినిమాల ఎంపికలో డాడీ హెల్ప్ చేస్తారా?" "డాడీ అస్సలు ఇన్వాల్వ్ కారు. అటువంటివి ఆయనకు ఇష్టం వుండదు. ఎవరి డెసిషన్ వాళ్లు తీసుకోవాలని అంటారాయన. ఎవరి కెరీర్ ను వాళ్లే నిర్మించుకోవాలని చెబుతారు. సో.. ఈ విషయంలో ఆయన ప్రమేయం వుండదు" "సరే, ఈ 'అనగనగా..' సినిమా ప్రాజక్టు వచ్చినప్పుడు ఎలా ఫీలయ్యారు?" "ఈ ప్రాజక్టు నా వద్దకు వచ్చినప్పుడు ముందు ఆశ్చర్య పోయాను. వండర్ ఫుల్ ప్రాజక్ట్ అనిపించింది. తర్వాత ఇందులో హీరో సిద్ధార్థ్ అనగానే కాస్త భయపడ్డాను. అలాంటి ఆర్టిస్టుతో చేయగలనా? అనిపించింది. అయితే, చాలెంజేస్ ను ఎలా ఫేస్ చేయాలో డాడీ దగ్గర నేర్చుకున్నాను కాబట్టి, ధైర్యంగా ముందుకు నడిచాను" "ఇందులో మీ క్యారెక్టర్ ఎలా సాగుతుంది?" "ఒక క్వీన్ లాంటి యువతి పాత్ర. ఆ క్యారక్టర్ పేరు ప్రియ. దాంతో మేకప్, డ్రెస్సింగ్ విషయంలో ఎంతో కేర్ తీసుకోవాల్సి వచ్చింది. డిల్లీ నుంచి వచ్చిన మేకప్ ఎక్స్ పర్ట్ చక్కని మేకప్ చేసారు. మేకప్ అయ్యాక నన్ను నేనే నమ్మలేకపోయాను. అద్దంలో చూసుకుంటే నాకు నేనే ముద్దొచ్చాను" "ఈ సినిమా హైలైట్స్ ఏమిటి?" "ముందు కధే పెద్ద హైలైట్. సోషియో ఫేంటసీ కదా? చూడడానికి థ్రిల్ గా వుంటుంది. డైరెక్టర్ ప్రకాష్ ప్రతి పాత్రనీ అద్భుతంగా మలిచాడు. మనల్ని మరో లోకంలో విహరింపజేస్తాడు. లక్ష్మీ ప్రసన్న పోషించిన ఐరెంద్రి పాత్ర కూడా చాలా బాగుంటుంది. తను బాగా చేసింది కూడా" "టాలీవుడ్ లో అనుభవం ఎలా వుంది?" "చాలా బాగుంది. ఇక్కడంతా వర్క్ మైండెడ్ పీపుల్. ఎవరిపని వాళ్లు కష్టపడి చేస్తారు. టాలీవుడ్ గురించి డాడీ ఎప్పుడూ చెబుతుండేవారు, మంచి ఇండస్ట్రీ అని. అది ఇప్పుడు ప్రత్యక్షంగా చూసాను" "గతంలో 'ఈనాడు' సినిమాకి సంగీతం సమకూర్చారు కదా, మళ్లీ ఎప్పుడు చేయాలనుకుంటున్నారు?" "సంగీతం అనేది ఎక్కువ టైం తో కూడుకున్న వ్యవహారం. ఒక సినిమాకు వర్క్ చేయాలంటే కనీసం నాలుగు నెలలైనా పడుతుంది. ఇక వేరే పనులు ఏవీ పెట్టుకోకూడదు. 'ఈనాడు' టైం లో కూడా అలాగే కొన్ని అవకాశాలు వదులుకున్నాను. ఇప్పట్లో మళ్లీ లేదనే చెప్పాలి" "సరే, ఈ సినిమా హిట్ అవ్వాలని కోరుకుంటూ... ఆల్ ది బెస్ట్" "థాంక్యు"