వేలానికి 'బృందావనం' కిరీటం, ఫ్లూట్

	టాలీవుడ్ మూవీ ఆర్టిస్ట్ అసోసియేషన్ (మా) పేద కళాకారుల సహాయార్ధం కొన్ని సినిమాలలో ఆయా హీరోలు ఉపయోగించిన వస్తువుల్ని వేలానికి పెడుతున్న సంగతి తెలిసిందే. ఇప్పుడు తాజాగా 'బృందావనం సినిమాలో యన్టీఆర్ వాడిన కిరీటాన్ని, ఫ్లూట్ ను ఆక్షన్ కు పెట్టారు. ఈ విషయాన్ని ఈరోజు (జనవరి 6 ) హైదరాబాదులో 'మా' కార్యాలయంలో 'మా' సభ్యులు తెలిపారు. 'మా' అధ్యక్షుడు మురళీ మోహన్ మాట్లాడుతూ, "గతంలో 'అదుర్స్' సినిమాలోని కోటును, 'మగధీర' లోని కత్తిని, 'సింహా'లోని గొడ్డలిని ఆక్షన్ కి పెట్టాం. మంచి రెస్పాన్స్ వచ్చింది. ఇప్పుడు అడగగానే దిల్ రాజు తమ 'బృందావనం' సినిమాలోని కిరీటం, ఫ్లూట్ ని ఇచ్చారు. వీటికి సంబంధించిన వివరాలు 'మా' వెబ్ సైట్ లో పెడుతున్నాం. అభిమానులు బాగా ఆదరించి దీనిని సక్సెస్ చేస్తారని ఆశిస్తున్నాం. ఆక్షన్ లో పాల్గొనడానికి చివరి తేదీ జనవరి 24 " అన్నారు. దిల్ రాజ్ చెబుతూ, "ఇక నుంచి నా ప్రతి సినిమాకు పేద కళాకారుల సహాయార్ధం లక్ష రూపాయలిస్తాను" అన్నారు. ఈ కార్యక్రమంలో ఇంకా శివకృష్ణ, హేమ, కాదంబరి కిరణ్, శేఖర్ కూడా పాల్గొన్నారు. సో... అభిమానులు ట్రై చేయచ్చు!