'శ్రద్ద' పెట్టి మరీ చేస్తున్న సినిమా!

ఆమధ్య 'వేదం' సినిమాలో అనుష్క వేశ్య పాత్ర చేసిన దగ్గర్నుంచీ చాలా మంది హీరోయిన్లు ఇలాంటి పాత్రల కోసమే ఎదురుచూస్తున్నారు. ఇప్పటికే శ్రియా బెంగాలీ సినిమాలో అలాంటి వేశ్య పాత్ర ఒకటి చేస్తోంది. తాజాగా శ్రద్దాదాస్ కూడా ఈ తరహా పాత్ర చేస్తోందట. 'ఇండియా షైనింగ్' అనే బాలీవుడ్ సినిమాలో ఆమెకు అలాంటి అవకాశం వచ్చింది. ఈ పాత్ర నటిగా తన స్థాయిని పెంచుతుందని శ్రద్దా ఆశలు పెట్టుకుంది. 'ఈ కేరెక్టర్ ఎంతో అద్భుతంగా మౌల్ద్ అయింది. రెడ్ లైట్ ఏరియాలో బ్రతికే ఓ అమ్మాయి జీవితంలోని భావోద్వేగాల సమ్మేళనమే ఈ చిత్రం. ఈ పాత్ర పోషణ నాకొక చాలెంజ్. అందుకే ఎంతో శ్రద్దపెట్టి మరీ ఈ సినిమా చేస్తున్నాను' అంటోంది శ్రద్దా. అటు బాలీవుడ్ లోనూ, ఇటు టాలీవుడ్ లోనూ సినిమాలు చేస్తున్నప్పటికీ, స్టార్ డం రానందుకు మాత్రం ఈ చిన్నది అసంతృప్తిగానే వుంది.