దేశమంతా ఇప్పుడు బాలీవుడ్ బాద్ షా షారుఖ్ ఖాన్ గురించే చర్చించుకుంటున్నారు. 'రీల్' లైఫ్ లో డూపుల చేత ఫైటింగ్ చేయించి, 'రియల్' లైఫ్ లో డూపుల అవసరం లేకుండా తనే ఫైటింగులు చేసేస్తున్న షారుఖ్ ని చూసి ఆశ్చర్యపోతున్నారు. సంజయ్ దత్ ఇచ్చిన పార్టీలో ఫుల్ గా మందుకొట్టిన మనవాడు, దర్శకురాలు ఫరాఖాన్ భర్త శిరీష్ కుందర్ ని కింద పారేసి, కుమ్మిపారేశాడన్న వార్త సంచలనం సృష్టిస్తోంది. అలా ఓ వ్యక్తిని పట్టుకుని కొట్టడం అమానుషమే అయినప్పటికీ, షారుఖ్ ని శిరీష్ ఎప్పటి నుంచో వ్యంగ్యం కూడిన వ్యాఖ్యల ద్వారా రెచ్చగొడుతున్నాడన్నది బాలీవుడ్ వర్గాల కథనం. మామూలుగా షారుఖ్ తన మీద తాను జోకులేసుకుంటాడు కానీ, ఎవరైనా వేస్తే మాత్రం ఏమాత్రం తట్టుకోలేడట. ఎవరైనా చిన్న కామెంట్ చేసినా కూడా ఆగ్రహంతో ఊగిపోతాడట. అలాంటి షారుఖ్ మీద శిరీష్ గత కొంత కాలంగా కుళ్లు జోకులు టన్నుల కొద్దీ తూచి మరీ వేసేస్తున్నాడనీ, అక్కడికీ షారుఖ్ ఎంతో ఓపిక పట్టాడనీ షారుఖ్ సన్నిహిత వర్గాలు అంటున్నాయి.'రా.వన్' సినిమా పేలిపోయిందనీ, 'డాన్ 2' సినిమా లేచిపోయిందనీ... శిరీష్ నోటికొచ్చినట్టు పిచ్చి జోకులు వేస్తూ, వాటిని ట్విట్టెర్లో పోస్ట్ చేస్తున్నాడట. దానికి తోడు ఈమధ్య షారుఖ్ తన సినిమాల అపజయాలతో కాస్త డిప్రెషన్లో కూడా వున్నాడట. ఇవన్నీ తోడవడంతో... పార్టీలో మూడు పెగ్గులు బిగించాక... ఎదురుగా శిరీష్ నవ్వుతూ, వేళాకోళం చేస్తున్న వాడిలా కనిపించడంతో... ఇక కాస్కో నా వాస్కోడీగామా... అంటూ షారుఖ్ కుమ్మికుమ్మి వదిలాడట. అది చాలదన్నట్టు సంజయ్ దత్ కూడా తన ఫిస్ట్ తో ఫినిషింగ్ టచ్ ఇచ్చాడట. ఆ విధంగా షారుఖ్ శిరీష్ మీద తన కసి తీర్చుకోవడమే కాకుండా... 'నాతో వేళాకోళం ఆడితే కోలాటం ఆడేస్తా జాగ్రత్త' అంటూ మిగిలిన వాళ్లకి కూడా ఓ సంకేతాన్ని పంపించాడని బాలీవుడ్ జనం అంటున్నారు. ఏమైనా, ఇకపై షారుఖ్ కి కాస్త దూరంగా ఉండడమే మంచిదని చాలా మంది ఇప్పటికే డిసైడ్ అయిపోయారట!
No comments:
Post a Comment