మన యువ కథానాయకులకి కావాల్సినంత ముందు చూపుంది. ఆదాయం విషయంలో అవసరమైనంత జాగ్రత్త వుంది. అంతకు ముందు తరంలా వాళ్లు కేవలం సినిమాల పై మాత్రమే దృష్టి పెట్టడం లేదు. ఓ వైపున వరసగా సినిమాలు చేస్తూనే, మరో వైపున వ్యాపార ప్రకటనల్లో విరివిగా నటిస్తున్నారు. వీలైనన్ని వైపులా తమ ఇమేజ్ ని విస్తరింపజేస్తూ కాసులు సంపాదించడం కోసం కాలం కన్నా ముందుగా పరిగెడుతున్నారు. ఈ పరుగులో కూడా అందరికంటే ముందు మహేష్ బాబే వుండటం విశేషం. ఇక జూ. ఎన్టీఆర్ ... రాం చరణ్ తమదైన స్టైల్లో యాడ్స్ లో నటిస్తున్నప్పటికీ వాళ్ల కన్నా ఫాస్ట్ గా అల్లు అర్జున్ ముందుకు దూసుకు వెళుతున్నాడు. రీసెంట్ గా ఓరల్ కేర్ మార్కెట్ లో లీడర్ గా వున్నకోల్గేట్ పామోలివ్ (ఇండియా ) ఆంధ్ర ప్రదేశ్ లో తన మాక్స్ ఫ్రెష్ బ్రాండ్ అంబాసిడర్ గా అల్లు అర్జున్ ని ఎంపిక చేసుకుంది. ఇందుకోసం అతనికి భారీ మొత్తంలో పారితోషికాన్ని ముట్టచెబుతున్నారట. ఇక అల్లు అర్జున్ ప్రస్తుతం త్రివిక్రం శ్రీనివాస్ దర్శకత్వం లో ఓ చిత్రం లో నటిస్తున్నాడు. హారిక-హాసిని క్రియేషన్స్ బ్యానర్ పై ఎస్. రాధాకృష్ణ నిర్మిస్తున్న ఈ సినిమాలో కథానాయికగా ఇలియానా అలరించనుంది. దేవిశ్రీ ప్రసాద్ సంగీతాన్ని సమకూరుస్తోన్న ఈ సినిమాకి ఫైట్ మాస్టర్ గా పీటర్ హెయిన్స్ వ్యవహరిస్తున్నారు. ఇటీవలే హైదరాబాద్ లోని రామోజీ ఫిలింసిటీలో ఈ సినిమాకి సంబంధించిన పోరాట సన్నివేశాలను చిత్రీకరించడం జరిగింది. సరదా సరదాగా సాగిపోయే ఈ ప్రేమ కథా చిత్రం త్వరలోనే ప్రేక్షకుల ముందుకు రానుంది. ఇలా ఓ వైపున సినిమాలతో... మరో వైపున వ్యాపార ప్రకటనలతో బన్నీ చాలా బిజీగా వున్నాడు. మొత్తానికి తన స్టైల్ కి రెండు వైపులా సంపాదనే అని బన్నీ బాగానే నిరూపిస్తున్నాడు కదూ?
No comments:
Post a Comment